Rom 11 | MYW | STEP | Adok Yowbad bo ipiyev angamag tasiyas min-Yisleil, ne? Nag. Yey gum-Yisleil teitan yey. Ebelam delen teitan yey, agukum Binyamin.

Romans 11

Bikatinabwes min-Yisleil mwasanin

1 Adok Yowbad bo ipiyev angamag tasiyas min-Yisleil, ne? Nag. Yey gum-Yisleil teitan yey. Ebelam delen teitan yey, agukum Binyamin.

2 Yowbad nag ipiyev inagamags tasiyas kweiboug nilivnek. Kuninuways liva̱nen Ilaytiy Bukitab waseg, peinan idibek Yowbad, ivtokes livan min-Yisleil, ilana,

3 “O Guyaw bo iweiys mupalopits, bo igulekwes mukwabeilun. Agumwa̱neta yey mugwamag nases, mo sivines kid beiweigs.”
4 Tage Yowbad ikatimop anilivan, ilana,

“Bo akayus gungamag kweinim kweiy tawsan nisesus. Nag ikululs wamatan Bal, gungamag tasiyas.”
5 Ma̱wan kweiboug Yowbad ikayus nagamag mwasanin, ma̱wan tut towen bo idawem min-Yisleil mwasanin yakamey, peinan nisiwyoubum.

6 Deisa isiwyoubum mo idawem. Nag idawem peinan mawotet bwanabwein; nag. Siwa̱youb-wan.

7 Ama̱wan? Min-Yisleil mwasanin inineivs Yowbad nasiwa̱youb, tage nag iba̱nes, yakamey gog nilivnek mo nakaban; tasiyas babaw bo ikakons.

8 Livneis nises Bukitab waseg mamagina:

“Yowbad bo iyabol ninous tasiyas.
Mites nag bikines; tiges nag biliganes ee... tut towen bo ma̱wan.”
9 Deibid-vak anilivan mamagina:

“Kadiloka sisagal bimlavag mamagina sik o mamagina wot.
O mamagina leg va̱gan bikatimop asisinap kalbaleb wasigeis.
10 Kadiloka beikaw mites; awoum bikines.
Kunes moumouvit waseg tut nag beikous.”

Ven babaw gimgilis

11 Adok min-Yudiy ikatpines kikeis, bikalouws ne? Nag. Bo bitamanaws vayuwein. Min-Yudiy bo ikalows, tage Yowbad bo isek nasiwa̱youb wasigeis tobwag ven gimgilis yakamiy, va̱gan bikatinabweimiy. Min-Yisleil bikineimiy mo bimouvit dibes.

12 Tut towen min-Yisleil bo ikalouws mo ven mwasanin yakamiy kumwa̱saws. Kukin vayuwein bitamanaws tasiyas min-Yisleil, o beisiws Yowbad nakaleiwag waseg, mo singay bitamwa̱saws.

13 Adibakeimiy tobwag ven gimgilis yakamiy, peinan gunawotet akokew liva̱nen Kelis bassekeimiy ven babaw yakamiy; mo atawtoun gunawotet waseg va̱gan bukusimounids yakamiy mo min-Yisleil tasiyas bimouvit dibes, mo bisimounids mwasanin tasiyas, o Yowbad bikatinabwes.

15 Yowbad bo ipiyaves tasiyas min-Yisleil mo imsamwas siney ven mwasanin gimgilis. Igaw Yowbad beitam wasigeis min-Yisleil mo singay bimsamwas siney tasiyas. Tut towen nag isimounids; mamagina takanigs tasiyas. Tut wanakougwaw mo bisimounids mamagina takanigs tasiyas bo beikits vayuwein.

16 Tammwayas Yowbad inagamag, ma̱wan tut towen mo imlavag nagamag min-Yisleil. Kabebay-nen mamagina:

Pwalaw ivisan-wan bitakatibom silma̱nin Yowbad, va̱gan tamkwa̱lan mo bimlavag Yowbad navavag.
Youpeis-vak bitakatibom silma̱nin Yowbad, beisob mo bimlavag Yowbad nakamweilok.
Tammwayas ma̱wana youpeis; kay ma̱wana asibod avakaein.

17 Min-Yisleil mamagina Yowbad nakamweilok, yayagein mwasanin bo iwwutus ikalouws, o yakamiy mamagina tobwag kay yayagein yakamiy kunekes kay towen atimapun tasiyas nikalouws, mo kay tonen sipinen iwmwamweimiy.

18 Awoum kwaya̱pams peinan yayagein tasiyas nikalouws. Kukin bukwaya̱pams kadiloka kuninuways awoum bukwaleiwags kay-nen waseg, tage kay wawun bikaleiwag wasigeis yakamiy.

19 Adok bukulana, “Min-Yisleil mamagina kay; yayagein tonen bo iwut va̱gan tobwag gamag yey ban bikativaseig kay towen waseg.”

20 Mounid. Bo iwtuwut tasiyas peinan nag isimounids. Tage ya̱koum nukuses bwein peinan kusimounid. Mata ge bukwaya̱pam. Kadiloka bukuwen Yowbad. Nag ikayus yayagein tatonen; adok nag bikayuseim peinan tobwag yayagein yak.

22 Kukines Yowbad nasiwa̱youb son nakaleiwag tawtoun. Nakaleiwag tawtoun wasigeis tasiyas nikalivatouws, tage nisiwyoubumiy yakamiy magat bukutoukums nasiwa̱youb waseg. Kukin gog nag, mo biwutumiy yakamiy.

23 Tasiyas-vak, kukin nag bivvalutsa kapidab waseg, mo bikativases vayuwein kay towen waseg, peinan Yowbad kadilok bivag mo bikatuvas vayuwein.

24 Yowbad inakaleiwag kweitan wasigeis yakamiy, peinan bo iwutumiy tobwag kay waseg mo ikaweimiy ikativaseimiy waseg nakaligweg tatonen. Tage sivinan bikow yayagein tatonen bikativases kay-nen waseg, vayuwein mo binekes.

Min-Yisleil

25 Sigwey, awoum kwaypamwes sinap. Sinap kweiboug nisowm, bo ikamat. Sivinag bukukwakins mamagina: Min-Yisleil mwasanin bo ikeikay dibes, ikapidabs ee... igaw tobwag ven gimgilis beisiws Yowbad nakabkaleiwag, babewein bikadilok; mo Yowbad bikatinabwes min-Yisleil asibabaw-wan. Liva̱nen nises Bukitab waseg mamagina:

“Towen takatinabweids, Sayon waseg beinoy beim.
Bivag mo beikous kalbaleb sinap Yekob delen wasigeis.
27 Igaw gunakaleiwag basekes tasiyas, peinan bakow asisinap kalbaleb, banow, balev.”
28 Min-Yisleil bo ikamliwes Yowbad, pinamiy yakamiy, va̱gan bukuliganes liva̱nen Yeisuw; tage Yowbad sivinan tasiyas, peinan ilivnek nasiwa̱youb wasigeis tibsiyas.

29 Yowbad bidawes gamag mwasanin o bisiwyoubus, ta-ma̱wan bigidem anilivan tatonen.

30 Ven mwasanin gimgilis yakamiy kweiboug nukusiplaves aygan Yowbad; tasiyas-vak min-Yisleil isiplaves aygan Yowbad, mapuna inok nuwan yakamiy.

31 Tasiyas nikapidabs, mo Yowbad inok nuwan yakamiy. Waseg mo binok nuwan tasiyas.

32 Yowbad bo ilivan babaw gamag takapidabs ya̱kids mo binok nuwan ya̱kids, bikatinabweids. Nanon bo ma̱wan.

33 Yowbad ansinap singaya ivakaein wananon. Inakaleiwag nag takakins. Nawotet waseg bo isom nanouds.

34 Ta-kal iyakous daGuyaws nanon. Ta-kal bikatimlek Yowbad ansinap.

35 Ta-kal bisiwa̱youb Yowbad waseg va̱gan Yowbad mo bimop nasiwa̱youb, nag.

36 Yowbad tonena ibun youd babaw, nisesus, peinan towen. Mapuna bitayakawanes tut nag beikous. Eimen.